ပန်ဒိုရာ၏ သေတ္တာကို ရှင်းထုတ်ခြင်း

ယခုလက်ရှိကာလ အချိန်သည် စိတ်ဝင်စားစရာ ကောင်းပါသည် ။ အလုပ်များ ပျောက်ကုန်သည် ၊ ဂျင်နရယ်မော်တော်သည် ငွေကြေးရင်းမြစ် ခမ်းခြောက်နေသည် ။ တစ်ချိန်တည်းမှာပင် အမေရိကန်ပြည်ထောင်စုသည် အိုဘားမားကို ရွေးကောက်ပွဲတွင် မဲပေးခြင်းဖြင့် ၎င်း၏ အနက်ရှိုင်းဆုံးသော ဒဏ်ရာများကို သက်သာရာရစေခဲ့သည် ။ လူတွေ၏ ပိုက်ဆံအိတ်ထဲတွင် ပိုက်ဆံနည်းသွားသော်လည်း နှလုံးသားထဲတွင်မူ မျှော်လင့်ချက်များ များလာပါသည် ။
မျှော်လင့်ချက်သည် ဆာလောင်နေသည့် အစာအိမ်များကို ဖြည့်ဆည်းမပေးနိုင်ပါ ။ သို.သော် ၎င်းတွင် စွမ်းအားရှိပါသည် ။ ဂရိဒဏ္ဍာရီ၌ ပန်ဒိုရာသည် သူမ၏ သေတ္တာကို ဖွင့်လိုက်သောအခါ ဆိုးယုတ်မှုအားလုံး လွတ်ထွက်သွားခဲ့သော်လည်း မျှော်လင့်ချက်ကိုမူ လွတ်မသွားအောင် ထိန်းနိုင်ခဲ့သည်ဟု ဆိုပါသည် ။ ဂရိလူမျိုးတို.က မျှော်လင့်ချက်ကို အန္တရာယ်ဟု ယူဆကြ၍ ၎င်း၏နောက်လိုက် အစွယ်အပွါးတို.က ထင်ယောင်မှားမှု များကို ဖြစ်စေသည်ဟု မှတ်ယူကြသည် ။ နစ်ရှေးကလည်း မျှော်လင့်ချက်ကို လူသား၏ ပူပင်သောကများကို ရှည်လျားစေသော မကောင်ဆိုးဝါးတစ်ခု အဖြစ် ရှုမြင်ခဲ့သည် ။
သို.သော်လည်း နောက်ဆုံးတွင် ပန်ဒိုရာသည် သူမ၏ သေတ္တာကို တစ်ဖန်ပြန်ဖွင့်ကာ မျှော်လင့်ချက်ကိုပါ လွှတ်ပေးလိုက်သည် ။ အကြောင်းမှာ ၎င်းမရှိလျှင် လူသား၏ ဘဝသည် ခြောက်သွေ.၍ စိတ်ပျက် လက်မှိုင်ချစရာချည်းသာ ရှိနေသောကြောင့်ဖြစ်သည် ။
ဤသည်မှာ ဒဏ္ဍာရီ မူကွဲတစ်ခု ဖြစ်ပါသည် ။ သေချာသည်ကတော့ ယခုလတ်တလောတွင် မျှော်လင့်ချက်များ တော်တော် များနေသည့် အချက်ဖြစ်သည် ။ လူတွေ၌ ပိုက်ဆံနည်းသွားသောကြောင့် ပို၍ ပျော်ရွှင်လာသည် ဟုဆိုလျှင် ပုံကြီးချဲ.ရာ ရောက်ပါလိမ့်မည် ။ သို.သော် ကျွန်တော်တို.၏ “သုံး ၊ သုံး ၊ သုံး ၊ သုံးပြီးရင်သုံး” ဆိုသည့် အလွန်အကျွံ သုံးစွဲမှု အတိုင်းအတာ ပမာဏအတွက် ရှက်ရွံ.မှုများ ပေါ်ထွက်လာသည် ကိုတော့ သေသေချာချာ ပြောနိုင်ပါသည် ။
ဤကဲ့သို. ပေါ့ပေါ့တန်တန် ဈေးဝယ်ထွက်ကြသော ကာလအတွင်း၌ ၂.၆ ထရီလီယံ ဒေါ်လာမျှ အကြွေးတင်သွားခဲ့သည် ။ အံ့ဩထိတ်လန်.ဖွယ်ရာပမာဏ ဖြစ်ပါသည် ။
မျက်လှည့် တုတ်တံဖြင့်တို.၍ ဥုံဖွဟု မန်းမှုတ်ရုံဖြင့် အကြွေးကျေသွားနိုင်လိမ့်မည်ဟု ယူဆ၍မရနိုင်ပါ ။ ဤအိမ်အပေါင်ထားသော ငွေများဖြင့် ပေါ့ပေါ့ပါးပါး ပျော်ပျော်ရွှင်ရွှင် သုံးဖြုန်းခဲ့ခြင်း အတွက် ပြန်လည် ပေးဆပ် ရမည့် တန်ဖိုး ကတော့ ကြီးမားပါလိမ့်မည် ။ သို.သော် ကျွန်တော်တို.ဖြတ်သန်းနေသော ယနေ.ခေတ်ကာလကို စီးပွါးရေးအကြပ်အတည်း ကိုကြည့်၍ လွဲမှားစွာ သုံးသပ်ခြင်းကိုမူ ဆန်.ကျင်ရပါလိမ့်မည် ။ မဟုတ်ပါ ။ ဘီလ်ကလင်တန် သာဆိုလျှင် ကျွန်တော်တို.၏ နေပုံထိုင်ပုံ ကျွန်တော်တို.၏ ယဉ်ကျေးမှုနှင့် ကျွန်တော်တို.၏ မိုက်မဲရူးသွပ်မှုကို အပြစ်တင်ပါလိမ့်မည် ။
မည်သို.သော ယဉ်ကျေးမှုပေနည်း ။ ပေါ့ပေါ့ပါးပါး ဈေးဝယ်ထွက် သုံးဖြုန်းခြင်းကို မျိုးချစ်စိတ်အရှိဆုံး လုပ်ရပ်အဖြစ် သွန်သင်သော ယဉ်ကျေးမှု ။ အကောင်းဆုံးနှင့် အထက်မြတ်ဆုံးသော ဦးနှောက်များကို ဝေါစထရိသို. ရောက်ရှိသွားစေကာ စတော့များဘွန်းများကို လောဘအလျှောက် အဆင်ခြင်မဲ့စွာ ရောင်းဝယ်စေရန် တွန်းပို.ခဲ့သော ယဉ်ကျေးမှု ။ လူတစ်ဦးချင်းစီ၏ အရေးနှင့် လူ.အဖွဲ.အစည်း၏ အရေးတို. သဟဇာတဖြစ်နေရန် မလို လိုက်လျောညီထွေ ဖြစ်နေရန် မလို ဟု သွန်သင်သော ယဉ်ကျေးမှု ။ ခြိုးခြံချွေတာသည့် အလေ့အကျင့်ကို တခဏတာအတွင်း စိတ်လှုပ်ရှားမှုဖြင့် ဘုန်းဘောလအော သုံးဖြုန်းပစ်တတ်သည့် အလေ့အကျင့်ဖြင့် အစားထိုးပစ်သည့် ယဉ်ကျေးမှု ။ မျှော်လင့်ချက်ကို ထင်ပေါ်ကြော်ကြားမှုဖြင့် အစားထိုးပစ်သည့် ယဉ်ကျေးမှု ။ စစ်ဖြစ်နေသည့် နိုင်ငံတစ်ခုအတွက် စွန်.လွှတ် အနစ်နာခံ ပေးဆပ်မှုများ လိုအပ်သည်ကို ငြင်းဆန်သော ယဉ်ကျေးမှု ။ ဤသို.သော ယဉ်ကျေးမှုမျိုးဖြစ်ပါသည်။
ထားလိုက်ပါတော့ ။ ထိုအခြင်းအရာများကို မေ့ပစ်လိုက်ကြပါစို. ။
ယခုရက်ပိုင်း အတွင်း၌ စိတ်အားတက်ကြွဖွယ် ကောင်းသော e-mail အများအပြား လက်ခံရရှိခဲ့ပါသည် ။ စိတ်ဓာတ်ရေးရာအရ အမူအကျင့်ပိုင်းဆိုင်ရာအရ ပြုပြင်ချိန်ညှိရေးကို ဖော်ပြထားသည့် စာများဖြစ်သည် ။ ကျွန်တော်တို.သည် ကျွန်တော်တို.၏ ညီငယ် ညီမငယ် များကို ထိန်းသိမ်းလမ်းညွှန်သူများ ဖြစ်နိုင်ကြပါသည် ။ ကျင့်ဝတ်ပိုင်းဆိုင်ရာ ပြုပြင်နိုင်မည့် နည်းလမ်းများကို ပြန်လည် ဖော်ထုတ်ထားသည့် စာများဖြစ်ပါသည် ။ ဗာဂျီးနီးယား ပြည်နယ် ပို.စ်မောက်မှ အသက် ၇၃ နှစ်ရှိ ဒိုင်ယာနာစထရူးလိုးက ဤသို.ရေးထားသည် ။ “ကျွန်မ အိုဘားမားကို မဲပေးရတဲ့အကြောင်းက အသိဥာဏ် ထက်မြက်ပြီး ကိုယ်.ကိုကိုယ် လေးစားမှုရှိတဲ့ သမ္မတ တစ်ယောက်ဟာ ကျွန်မတို.ရဲ. ယဉ်ကျေးမှုကို ပြန်လည်ဆန်းသစ် နိုင်လိမ့်မည် ၊ တစ်ခါတုန်းက အမေရိကန်တွေကြားမှာ ရှိခဲ့ဖူးတဲ့ တစ်ယောက်ကို တစ်ယောက် ချစ်ခင်မှုမျိုးတွေကို ပြန်လည် ဆန်းသစ် နိုင်စေလိမ့်မည် ဆိုတဲ့ မျှော်လင့်ချက်ကြောင့် မဲပေးခဲ့တာပါ” ဟု ရေးထားပါသည် ။
ဤမျှော်လင့်ချက်တို.မှာ အရေးပါလှသဖြင့် စီးပွါးရေးနှင့်ပက်သက်၍ စိုးရိမ်ကြောင့်ကြ မှုများသည်ပင်လျှင် ဤပြင်းပြသော တောင့်တမှုများ အောက်တွင်မှေးမှိန်၍ နေသည်ဟု သူမက ဆက်၍ ရေးပါသည် ။
နောက်စာတစ်စောင်မှာ ၂၀၀၇ ခုနှစ် ဇန်နဝါရီလအတွင်း၌ အီရတ်နိုင်ငံ ဖာလူဂျာတွင် အမှတ် ၁ နှင့် အမှတ် ၂ မရိန်းတပ်မများနှင့် တာဝန်ထမ်းဆောင် နေသော အမေရိကန် အရာရှိတစ်ယောက်ထံမှ ဖြစ်သည် ။ ၂၀၀၇ ခုနှစ် ဇန်နဝါရီလ ၂၇ ရက်နေ.က အထက်လွှတ်တော် အမတ် အိုဘားမားထံသို. ပို.ထားသည့် e-mail ကို ကျွန်တော့်ထံသို. ဆက်ပို.ထားခြင်း ဖြစ်သည် ။ သမ္မတအဖြစ် ယှဉ်ပြိုင် အရွေးခံမည့် အကြောင်း မစ္စတာ အိုဘားမား တရားဝင် ကြေညာခါနီး အချိန်တွင် ပို.လိုက်သည့် e-mail ဖြစ်ပါသည် ။
“ဒီအန္တရာယ်များတဲ့ အီရတ်စစ်မြေပြင် သဲကန္တာရမှာ တာဝန်ထမ်းဆောင်နေဆဲဖြစ်တဲ့ ကျွန်တော်တို.အတွက် ကျွန်တော်တို.ရဲ. အမိမြေက အီရတ်အကြောင်း ဆွေးနွေးငြင်းခုံ ပွဲတွေမှာ တင်ပြဆွေးနွေးမည့် သင့်အယူအဆများနှင့် သင်.သတင်းစကားတွေလိုအပ်ပါတယ် ။ ဒီ့အပြင် ပါတီတစ်ခုတည်း အကြောင်းသာမကဘဲ ကြီးကျယ်ခမ်းနားတဲ့ ကျွန်တော်တို.ရဲ. အစဉ်အလာတွေကို ပြန်လည် ဆန်းသစ်စေမည့် နိုင်ငံရေးအခင်းအကျင်းမျုိုးကို ကျွန်တော်တို. မျှော်လင့် တောင့်တမိပါတယ် ။ သင်ဟာ တစ်ခြားသူများနှင့် မတူဘဲ ဒီမျှော်လင့်ချက်တွေကို အမှန်တကယ် ရိပ်စားနားလည်သူ ဖြစ်ပါတယ် ။”
“ဒီခက်ခဲလှတဲ့ တာဝန်ချိန်ကာလ တစ်လျှောက်လုံးမှာ အန်ဘာမြို.ရဲ. စုတ်ပြတ်နေတဲ့ လမ်းတွေပေါ်မှာ မြင်တွေ.ရတဲ့ ကျွန်တော်တို.ရဲ. တပ်ကြပ်ကြီးတွေ ၊ ဗိုလ်ကြီးတွေ ၊ ဗိုလ်မှုးကြီးတွေရဲ. ခေါင်ဆောင်မှုတွေအတွက် ကျွန်တော်ဟာ အမြဲတန်းလိုလို ဝါရှင်တန်ကို မျှော်ကြည့်မိပါတယ် ။ အီရတ်ကအခြေအနေတွေဟာ အင်မတန် စိတ်ပျက်အားငယ်စရာပါဘဲ။ အီရတ်မှာရှိတဲ့ ထောင်ပေါင်းများစွာသော အမေရိကန်တွေရဲ. အကြားမှာ၊ သူတို.ရဲ.ရင်ထဲမှာ နိုင်ငံရေးအရောင် စွန်းထင်းမှု မရှိတဲ့ တိုင်းပြည်ကိုချစ်တဲ့ မျိုးချစ်စိတ်တွေဟာ စိမ့်ဝင် ဖြစ်တည် လာနေပါတယ် ။ ကြီးကျယ်မြင့်မြတ်တဲ့ နောက်မျိုးဆက်တစ်ခုဟာ ပိုမိုကောင်းမွန်တဲ့ အရာတွေနဲ.ထိုက်တန်ပါတယ် ။”
သူ.အလုပ်၏ စည်းမျဉ်းစည်းကမ်းအရ နာမည်ပြောခွင့်မရှိသည့် ထိုအရာရှိက ဤသို. ဆက်၍ ရေးပါသည် “ကျွန်တော်ဟာ မကြာခင် ကာလအတွင်းမှာ အီရတ်ကနေအိမ်ပြန်ရတော့မှာပါ ။ ဖာလူဂျာကနေ စပရင်းဖီးလ်ကို တိုက်ရိုက်သွားပြီး သင့်ရဲ. သမ္မတလောင်းအဖြစ် တရားဝင်ကြေညာမှုကို လူကိုယ်တိုင် နားထောင်မယ်လို. စဉ်းစားထားပါတယ် ။ ကျွန်တော် အဲဒီအချိန်မှာ အဲဒီမှာ ရှိနေချင်ရုံတင်သက်သက်ပါပဲ ။” အညတရစစ်သည် ။ သူ.စာကို ဤသို. နိဂုံးချုပ်ထားပါသည် ။ “သင့်ကို သမ္မတ တစ်ယောက်အဖြစ် မြင်ယောင် ကြည့်လိုက်တဲ့အခါမှာ၊ အီရတ်က အဖြစ်အပျက်တွေရဲ. နိဂုံးချုပ်အပိုင်းနဲ. ကျွန်တော်တို. အင်မတန်လွမ်းဆွတ်တမ်းတပြီး ကိုယ်စားပြုဂုဏ်ယူနေချင် စမြဲဖြစ်တဲ့ ကျွန်တော်တို. အမိမြေပေါ်က ကဏ္ဍသစ်တွေ အတွက် ကျွန်တော်ရဲ. မျှော်လင့်ချက်တွေ ပိုမို ခိုင်မာ ပြတ်သားလာမိပါတယ်။”
မှန်ပါသည် ။ ထောင်ပေါင်းများစွာသော အမေရိကန်များသည် ရှည်ကြာလှသော စစ်မှုထမ်းကာလနှင့် စွန်.လွှတ် ပေးဆပ်ခြင်းများ စွာ ပြုနေကြရပါသည် ။ ထို.အတွက် ပိုမိုကောင်းမွန်သော အရာများနှင့် ထိုက်တန်ပါသည် ။
စင်စစ် ထိုပိုမိုကောင်းမွန်မှုမှာ သမ္မတတစ်ယောက် (ဂျော.ဒဗလျူဘုရှ်) တည်းအတွက်သာမဟုတ်ပါ ၊ လွယ်လွယ်ကူကူ ငွေချေးရလွယ်ကူမှုသည် ထိတ်လန်.တုန်လှုပ်မှုကြောင့် လွယ်လွယ်ကူကူ မှတ်ဥာဏ်ချို.ယွင်း ပျောက်ကွယ်မှုအဖြစ် အသွင်ပြောင်းသွားသော ကျွန်တော်တို. အားလုံးအတွက်လည်း ဖြစ်ပါသည် ။ ပိုက်ဆံကို အကျိုးရှိရှိ စီစစ်၍ သုံးစွဲခြင်းသည် လူမှုစနစ် အသစ် ဖြစ်ကောင်းလည်း ဖြစ်နေနိုင်ပါသည် ။
ယခုအချိန်သည် အမေရိကန်ပြည်ထောင်စုအနေဖြင့် ကမ္ဘာကြီး၏ မျှော်လင့် ကိုးစားမှုများကို မည်မျှအထိ ဖြည့်ဆည်းပေးနိုင်မည် ဆိုသည်ကို တစ်ကမ္ဘာလုံးက စောင့်ကြည့် အကဲဖြတ်မည့် အချိန်ဖြစ်ပါသည် ။ စီးပွါးရေးနှင့် ပက်သက်၍ စိုးရိမ်ကြောင့်ကြမှုများသည် အိုဘားမားအပေါ် စုပုံထားသော မျှော်လင့်ကိုးစားမှုများ ကဲ့သို.ပင် ကျယ်ကျယ်ပြန်.ပြန်. ပျံ.နှံ.နေပါသည် ။ ဤအမူအကျင့် ကျင့်ဝတ်သိက္ခာပိုင်းဆိုင်ရာ ပြောင်းလဲနိုင်မည့် အခွင့်အလမ်းမှာ အမေရိကန်ပြည်ထောင်စု တစ်ခုတည်းတွင်သာ ကွက်၍ ဖြစ်နေသည်မဟုတ်ပါ ။
ဘုရ်ှဆန်.ကျင်ရေး အယူဝါဒမှ မကြာခဏ လမ်းလွဲအသွင်ပြောင်း သွားတတ်သော အမေရိကန်ဆန်.ကျင်ရေး အယူဝါဒသည် မကြာသေးမှီ ကာလများအတွင်းက ရေပန်းစားသော အယူဝါဒရေးရာ ရေစီးကြောင်း ဖြစ်ပါသည် ။ အိုဘားမားကိုရွေးချယ်လိုက်ခြင်းဖြင့် ဤအယူဝါဒ ပျောက်ကွယ်သွားမှု သို.မဟုတ် အနည်းဆုံး အားပျော့သွားမှုသည် အယူအဆရေးရာ လစ်ဟာမှုတစ်ခု ကျန်ရစ်စေခဲ့ပါသည် ။ ထိုလစ်ဟာမှုကို ဖြည့်ဆည်းရန် လိုအပ်ပါသည် ။
မည်သို. ဖြည့်ဆည်းရမည် ဆိုသည်ကို ဤသို. ကျွန်တော် စိတ်ကူးဥာဏ် ကွန်.မြူးကြည့်မိပါသည် ။ မျှော်လင့်ချက်သည် ပန်ဒိုရာ၏ သေတ္တာမှ တောင်ပံဖြန်. ပျံသန်းသွားပါသည် ။ အကြပ်အတည်းက နိုင်ငံရေးအရ ဦးဆောင်နိုင်စွမ်းကို တောင်းဆိုပါသည် ။ အကြပ်အတည်း ကာလတွင် နိုင်ငံကို ဦးဆောင်နိုင်စွမ်း မြင့်မြင့်မားမား ရှိဖို. လိုအပ်ပါသည် ။ ဤဦးဆောင်နိုင်သည့် စွမ်းရည်သည် ရုပ်ဝတ္ထုပိုင်းမျှဖြင့် မလုံလောက်ပါ ။ လူသားဝိဥာဉ်၏ အစဉ်သဖြင့် တောက်လောင်နေသော မငြိမ်းသတ်နိုင်သည့် ဆန္ဒများကို ဖြည့်ဆည်းပေးနိုင်ရန် ၊ လူသားတို.၏ နှလုံးသားများကို ဖြည့်ဆည်းပေးနိုင်ရန်လည် လိုအပ်ပါသေးသည် ။


(November 9, 2008 ခုနှစ်ထုတ် အင်တာနေရှင်နယ်ဟာရယ်ထရီဗြွန်း သတင်းစာမှ Roger Cohen ၏ Emptying Pandora’s Box ဆောင်းပါးကို သင့်လျော်အောင် ဘာသာပြန်ဆိုပါသည် ။)