တရုတ်ပြည် စီးပွါးရေး ဖွံ.ဖြိုးတိုးတက်ခြင်း၏ အကြောင်းရင်းများ ၊ အခန်း ၅ (နိုင်ငံတော် အကျဉ်းသား)

အပိုင်း ၃

တရုတ်ပြည် စီးပွါးရေး ဖွံ.ဖြိုးတိုးတက်ခြင်း၏ အကြောင်းရင်းများ

အခန်း ၅

ကျောက်နှင့်ဟူကြားမှ ပဋိပက္ခ

၁၉၈၀လွန် အစောပိုင်းနှစ်ကာလများအတွင်းက တရုတ်ပြည်၏ စီးပွါးရေးသည် ပုံစံကျ

ဆိုရှယ်လစ်စီးပွါးရေးစနစ်၏ လက္ခဏာရပ်များ ရှိနေဆဲဖြစ်သည် ။ ကုန်ထုတ်လုပ်ရေး ခွဲတမ်းများကို

ယူနစ်အသီးသီးသို. ဗဟိုမှချမှတ်ပေးသည် ။ ဝန်ကြီးချုပ်တစ်ဦးအနေဖြင့် ကျောက်ကျိယန်သည်

ဤခေတ်မမှီတော့သော လုပ်နည်းလုပ်ဟန်များမှ ခွဲထွက်ရန် ကြိုးစားသည် ။ သို.သော်

ဤသို.လုပ်ဆောင်ရာ၌ သူ၏မဟာမိတ် ပါတီအထွေထွေအတွင်းရေးမှုး ဟူယောင်ဘန်းနှင့်

သဘောထားကွဲလွဲခဲ့ရသည် ။

ပါတီခေါင်းဆောင်၏ တာဝန်ဝတ္တရားများနှင့် အစိုးရအဖွဲ.ခေါင်းဆောင် ဝန်ကြီးချုပ်၏

တာဝန်ဝတ္တရားများကြားတွင် တိကျသည့် အသေးစိတ်တာဝန်ခွဲဝေမှု မရှိကြောင်း ဤပဋိပက္ခက

မီးမောင်းထိုးပြနေသည် ။ သဘောတရားအားဖြင့်ဆိုပါက နိုင်ငံတော်ကောင်စီ အကြီးအကဲအနေဖြင့်

ကျောက်သည် စီးပွါးရေးဆိုင်ရာ အရေးကိစ္စများကို စီမံခန်.ခွဲရမည်ဖြစ်သည် ။ လက်တွေ.တွင်မူ ပါတီက

ဝင်ရောက်စွက်ဖက်နေဆဲဖြစ်သည် ။ နောက်ပိုင်းတွင် ကျောက်ကျိယန်

ပါတီအထွေထွေအတွင်းရေးမှုးဖြစ်လာပြီး လီပန်းက ဝန်ကြီးချုပ်ဖြစ်လာချိန်၌လည်း ဤပြဿနာသည်

ပြန်လည်၍ ပေါ်ထွက်လာခဲ့ပြန်သည် ။

ကုန်ထုတ်လုပ်ရေး ကိန်းဂဏန်းများနှင့် စီးပွါးရေးဖွံ.ဖြိုးမှု အရှိန်နှုန်း တိုးတက်ရေးကို ဦးစားပေးသည့် နည်းလမ်းဟောင်းများကို သဘောမတူပဲ စီးပွါးရေး စွမ်းဆောင်ရည်ကို အလေးပေးသည့် ကျွန်တော်၏ ရပ်တည်ချက်သည် ဘေဂျင်းသို. ကျွန်တော်ရောက်လာပြီးနောက်၌ ဟူယောင်ဘန်းနှင့် ကျွန်တော် ပဋိပက္ခဖြစ်ရခြင်း၏ အကြောင်းရင်းပင်ဖြစ်သည် ။

အယူအဆကွဲပြားမှုမှာ ၁၉၈၂ ခုနှစ်ကတည်းကပင် စတင်ပေါ်ထွက်ခဲ့ခြင်းဖြစ်သည် ။ ၁၂ ကြိမ်မြောက် ပါတီကွန်ဂရက်အတွက် နိုင်ငံရေးအစီရင်ခံစာမူကြမ်းကို ယောင်ဘန်းကကြီးကြပ်၍ ပြင်ဆင်ရေးသားချိန်၌ စီးပွါးရေးနှင့် ပက်သက်၍ မည်သို.တင်ပြမည်နည်းဟူသည့် မေးခွန်းပေါ်ထွက်လာသည် ။ အစပိုင်း၌ အစီရင်ခံစာရေးသားရေး ကော်မတီဝင် အတော်များများက ကျွန်တော်၏ ၁၉၈၁ ခုနှစ် အစိုးရအဖွဲ. အလုပ်အစီရင်ခံစာပါ အခြေခံအချက်များနှင့်အညီ ရေးသားဖို. ပြင်ဆင်ထားခဲ့ကြသည် ။ သို.သော် ယောင်ဘန်းက သဘောမတူခဲ့ပေ ။ သူက ကွဲပြားသည့် ချဉ်းကပ်နည်းကို အဆိုပြုခဲ့သည် ။ စီးပွါးရေးကဏ္ဍနှင့် ပက်သက်သည့် မူကြမ်းရေးဆွဲရေးမှာ တစ်ဆို.နေတော့သည် ။

ပြဿနာကို တိန်.ရှောင်ပင်းထံသို. တင်ပြလိုက်သောအခါ စီးပွါးရေးကဏ္ဍကို အစိုးရအဖွဲ. အလုပ်အစီရင်ခံစာနှင့်အညီ ရေးဆွဲသင့်သည်ဟု သူကဆုံးဖြတ်ခဲ့သည် ။ ယောင်ဘန်းက အင်တင်တင်ဖြင့် လက်ခံခဲ့ရသည် ။

အစီရင်ခံစာရေးသားသည့် လုပ်ငန်းစဉ်တွင် ကျွန်တော်မပါဝင်သဖြင့် သဘောထားကွဲလွဲသည့် အယူအဆများ မည်၍မည်မျှရှိကြောင်း ကျွန်တော်မသိခဲ့ပါ ။ ဤအကြောင်းအရာကို တည်ဆဲပေါ်လစ်ဗျူရိုကော်မတီ အစည်းအဝေး၌ သော်လည်းကောင်း အတွင်းဝန်များ အစည်းအဝေး၌ သော်လည်းကောင်း တင်ပြဆွေးနွေးခဲ့ခြင်းမရှိပါ ။ ထို.ကြောင့် ယောင်ဘန်း၌ မည်သည့်အယူအဆရှိကြောင်း သို.မဟုတ် ကျွန်တော်၏ အစိုးရအဖွဲ. အလုပ်အစီရင်ခံစာကို မည်သည့်အကြောင်းကြောင့် သူသဘောမတူကြောင်း ကျွန်တော် သေသေချာချာ မသိပါ ။

သို.သော်လည်း သူ၏မှတ်ချက်များနှင့် လုပ်ရပ်များအရ သူသည် ကုန်ထုတ်လုပ်ရေး ကိန်းဂဏန်းများနှင့် စီးပွါးရေး ဖွံ.ဖြိုးမှု အမြန်နှုန်းတို.အစား စီးပွါးရေးစွမ်းဆောင်ရည် အပေါ်တွင် အလေးပေးသည့် ကျွန်တော်၏ အယူအဆကို အဓိက သဘောမတူခြင်း ဖြစ်ဟန်တူသည် ။ သူသည် စီးပွါးရေးနှင့်ပက်သက်၍ ပြောဆိုသည့်အခါတိုင်း၌ စီးပွါးရေးတိုးတက်နှုန်းကို ထုတ်လုပ်မှုပမာဏနှင့် ထုတ်လုပ်မှု အရှိန်နှုန်းတို.ဖြင့် တိုင်းတာ၍ အဓိကဇောင်းပေးပြောလေ့ရှိပြီး စွမ်းဆောင်ရည်ကိုမူ မပြောသလောက်ပင်ဖြစ်သည် ။ သူသည် မကြာခဏဆိုသလိုပင် “လေးဆတိုး ထုတ်လုပ်ရေး” သို.မဟုတ် “သတ်မှတ်ထားသည့် အစီအစဉ်ထက် လေးဆစော၍ ပြီးစီးရေး” စသည်ဖြင့် ပြောကြားလေ့ရှိသည် ။

ဆဋ္ဌမ ငါးနှစ်စီမံကိန်း၌ “၄ ရာခိုင်နှုန်း တိုးတက်ဖို. အာမခံပြီး ၅ ရာခိုင်နှုန်း တိုးတက်အောင် အားထုတ်ကြ”ဟူသည့် ကျွန်တော်၏ အဆိုပြုချက်သည် သင့်တင့်လျှောက်ပက်သည့် ရည်မှန်းချက်ဖြစ်သည် ။ ရဲဘော်ရှောင်ပင်းသည်ပင်လျှင် ကုန်ထုတ်လုပ်မှု ကိန်းဂဏန်းများကို အလွန်အရေးကြီးသည်ဟု ခံယူပြီး နှစ်စဉ်ဖွံ.ဖြိုးမှုနှုန်းကို မကြာခဏ မေးမြန်းလေ့ရှိသည့်တိုင်အောင် စွမ်းဆောင်ရည်အပေါ်တွင် အာရုံစိုက်သည့် ကျွန်တော်၏ အယူအဆအပေါ် နားလည်မှုရှိကြောင်း ပြသလေ့ရှိသည် ။ သို.ဖြစ်ပါလျှက် ယောင်ဘန်းကမူ သဘောမတူပေ ။ ၁၂ ကြိမ်မြောက် ပါတီကွန်ဂရက်သို. တင်သွင်းသည့် အစီရင်ခံစာကို တိန်.၏လမ်းညွှန်ချက်အတိုင်း အစိုးရအဖွဲ.အလုပ်အစီရင်ခံစာပါ အခြေခံအချက်များနှင့်အညီ ရေးသားပြုစုခဲ့သော်လည်း သူ၏စိတ်ကမူ မပြောင်းလဲပေ ။

၁၂ ကြိမ်မြောက် ပါတီကွန်ဂရက်အပြီး ပြည်နယ်များသို. သူခရီးထွက်စဉ်၌ ကုန်ထုတ်လုပ်ရေး ရည်မှန်းချက်များ မြှုင့်တင်ရေးကို အလေးပေးရန် သူကပို၍ ခိုင်မာစွာ ဆုံးဖြတ်ခဲ့သည် ။ သူသွားလေရာ နေရာတိုင်း၌ “သတ်မှတ်ထားသည့် အစီအစဉ်ထက် လေးဆစော၍ ပြီးစီးရေး” ကို သူက တောင်းဆိုခဲ့သည် ။ သူသည် စီးပွါးရေးစွမ်းဆောင်ရည်အပေါ်တွင် လုံးဝအရေးမစိုက်ပဲ သို.မဟုတ် တိုးတက်မှုနှုန်း မတူညီရခြင်း၏ အကြောင်းရင်းများကို စိစစ်ခြင်းမရှိပဲ ထုတ်လုပ်မှုရည်မှန်းချက်များ မြင့်မားသည့် နေရာအားလုံး အခြေအနေအားလုံးကို ချီးမွမ်းပြီး ဤသို.မဟုတ်သည့် အခြေအနေအားလုံးကို ပြင်းထန်စွာ ဝေဖန်ခဲ့သည် ။

အကျိုးဆက်အားဖြင့် ဒေသဆိုင်ရာ အရာရှိများသည် ယောင်ဘန်း၏ လမ်းညွှန်ချက်အတိုင်း လိုက်နာဆောင်ရွက်ကြပြီး ဘတ်ဂျတ်ငွေများ ၊ စီမံကိန်းများအတွက် ခွင့်ပြုချက်များ ၊ လောင်စာဆီများအပါအဝင် ကုန်ကြမ်းပစ္စည်းများနှင့် ထောက်ပံ့မှုများကို စီမံကိန်းရေးဆွဲရေးကော်မရှင်နှင့် နိုင်ငံတော်ကောင်စီထံမှ ပိုမိုတောင်းခံလာကြသည် ။ ဒေသအသီးသီးကြားတွင် အလျှင်အမြန် တိုးတက်ရေးအတွက် ယှဉ်ပြိုင်မှုမှာ အချိန်အတော်ကြာသည်အထိ ပြင်းထန်နေခဲ့ပြီး ကုန်ကြမ်းပစ္စည်းနှင့် ဘဏ္ဍာငွေတို.ကို အလုအယက် ယှဉ်ပြိုင်တောင်းခံခဲ့ကြသည် ။ ကျွန်တော့်အတွက် ဤအခြေအနေများကို စီမံခန်.ခွဲရန် အခက်တွေ.ခဲ့သည် ။

၁၉၈၃ ခုနှစ်၌ ယောင်ဘန်းနှင့် ကျွန်တော်၏ကြားမှ ဤကွဲပြားမှုမှာ ပို၍ထင်ရှားလာခဲ့သည် ။ စီးပွါးရေးဖွံ.ဖြိုးရေး လူထုလှုပ်ရှားမှု အစီအစဉ်ကိုပင် သူကဆင်နွှဲခဲ့သည် ။ ဥပမာအားဖြင့် သူသွားလေရာနေရာတိုင်း၌ “နှစ်စဉ်ကျေးလက်ဒေသ လူတစ်ဦးချင်း ပျမ်းမျှဝင်ငွေကို ယွမ်တစ်ရာမျှ တိုးမြှုင့်ကြ” လှုပ်ရှားမှုကို သူကတက်ကြွှစွာ အားပေးမြှုင့်တင်သည် ။ ဤလှုပ်ရှားမှုကို ဟီဘေပြည်နယ် ဘိုဒင်းခရိုင်တွင် စတင်ခဲ့သည် ။ သူက လှုပ်ရှားမှု ပြုလုပ်နေသရွေ. ဝင်ငွေသည် နှစ်စဉ် ယွမ်ငွေတစ်ရာနှုန်းဖြင့် တိုးတက်နေလိမ့်မည်ဟု ယုံကြည်သည် ။ အနှစ်သာရမပါရှိပဲ အပေါ်ယံဆန်သည့် လုပ်ရပ်များအဖြစ် လွယ်လွယ်ကူကူ ပြောင်းလဲသွားနိုင်သည့် ဤကဲ့သို.သော နည်းလမ်းများကြောင့်ပင် ကျွန်တော်တို.သည် အတိတ်ကာလက နစ်နာမှုများ တွေ.ကြုံခံစားခဲ့ရခြင်းဖြစ်သည် ။

၁၉၈၃ ခုနှစ် ဇန်နဝါရီလအတွင်း အာဖရိကသို. ကျွန်တော်ခရီးသွားနေစဉ်၌ ယောင်ဘန်းက မြို.ပြဒေသ ပြုပြင်ပြောင်းလဲရေးအတွက် ကျေးလက်ဒေသ မြေယာကန်ထရိုက်စနစ်အတိုင်း လိုက်နာလုပ်ဆောင်ရန် အစီရင်ခံစာတစ်စောင် အဆိုပြုတင်ပြခဲ့သည် ။ ၎င်းမှာ မူအားဖြင့် ကောင်းမွန်ပေသည် ။ သို.သော် မြို.ပြဒေသ အခြေအနေများမှာ ပို၍သိမ်မွေ.ရှုပ်ထွေးလှသည် ။ တစ်ခုနှင့်တစ်ခု မတူခြားနားနေသည့် စက်မှုလုပ်ငန်းများနှင့် စီးပွါးရေးလုပ်ငန်းများအတွက် မည်သည့်ပုံစံဖြင့် ကန်ထရိုက်ကို အကောင်အထည်ပြီး ကန်ထရိုက်ကို မည်သို.ချုပ်ဆိုမည်နည်း ။ ဤအရာအားလုံးမှာ လက်တွေ.စမ်းသပ်ခြင်းနှင့် တဖြည်းဖြည်းချင်း အချိန်ယူဆောင်ရွက်သွားရမည့် အရာများဖြစ်သည် ။ ကျွန်တော်တို.သည် တစ်ချိန်တည်းတစ်ပြိုင်တည်းအတွင်း၌ အာလုံးကို ကန်ထရိုက်ချပေးဖို. မဖြစ်နိုင်သလို စစ်မျက်နှာအားလုံး၌ တစ်ပြိုင်တည်းရွေ.လျှားဖို.လည်း မဖြစ်နိုင်ပါ ။

ယောင်ဘန်း၏ မိန်.ခွန်းအပြီး၌ ဘေဂျင်းရှိ နိုင်ငံပိုင် စတိုးဆိုင်ကြီးများသည် ကန်ထရိုက်များ စတင်ချပေးလာသည် ။ ဈေးနှုန်းများတက်ခြင်းနှင့် “အစုအပုံလိုက် အကြီးအကျယ် ရောင်းချခြင်း”များ ချက်ချင်းဆိုသလို ဖြစ်ပေါ်လာခဲ့သည် ။ မည်သည့်အရာတို.ကို အစုအပုံလိုက် အကြီးအကျယ်ရောင်းချပါသနည်း ။ ၎င်းတို.မှာ နိုင်ငံပိုင် စတိုးဆိုင်ကြီးများမှ လက်လီရောင်းချသူများသို. အစုလိုက်အပုံလိုက် လက်ကားဈေးဖြင့် ရောင်းချခြင်းဖြစ်ပြီး သူတို.သည် စားသုံးသူများသို. ဈေးနှုန်းကြီးကြီးဖြင့် ပြန်လည်ရောင်းချခြင်းဖြင့် အကျိုးအမြတ် များစွာရရှိနိုင်သည်ဟု ရည်ညွှန်းနေခြင်းဖြစ်ပေသည် ။ နိုင်ငံပိုင်စတိုးဆိုင်ကြီးများသည် ထုတ်ကုန်ပမာဏများစွာကို လျှင်မြန်စွာရောင်းချနိုင်ပြီး ကန်ထရိုက်ချပေးရမည့် အလုပ်ကို လျှင်မြန်စွာ ပြီးစီးအောင်လုပ်နိင်သည်ဟု ထင်မြင်ဖွယ်ဖြစ်သည် ။ ၎င်းသည် ကုန်စည်ရောင်းဝယ်မှုကို မှန်ကန်စွာ လုပ်ကိုင်သည့် နည်းလမ်းမဟုတ်ပေ ။

အာဖရိကမှပြန်ရောက်ရောက်ချင်းပင် ကွန်တော်က ဤလုပ်ရပ်တို.ကို ရပ်တန်.စေခဲ့သည် ။ မြို.ပြပြုပြင်ပြောင်းလဲရေးကို စမ်းသပ်ချက်များမှတစ်ဆင့် ဖြည်းဖြည်းချင်း ဖော်ဆောင်သွားရမည်ဟု ကျွန်တော်က အကြံပြုခဲ့သည် ။ ထိုနှစ်၌ပင် ၁၉၈၃ ခုနှစ် နွေဦးပွဲတော် အခမ်းအနားစုဝေးပွဲ၌ ဤအကြောင်းကို ကျွန်တော်ပြောခဲ့သေးသည် ။ ထိုစဉ်က ယောင်ဘန်းသည် ဟိုင်နန်၌ နွေဦးပွဲတော် အားလပ်ရက် အပန်းဖြေနေသည် ။ ထိုဒေသရှိ ကေဒါတို.ကို “အားလုံးကိုတစ်ပြိုင်တည်းလုပ်ရမယ် ဟုတ်လား” “တကယ်တမ်းကျတော့ အခြေအနေတွေက ခင်ဗျားတို.ကမှ မတွန်းရင် ဘယ်သူမှ ရွေ.ကြတဲ့ပုံမရှိဘူး”ဟု သူကပြောခဲ့သည် ။

ဤကာလအတွင်း ပြည်နယ်များသို. စစ်ဆေးရေးထွက်သည့် ခရီးစဉ်များ၌ သူက(ဟူယောင်ဘန်းက) နိုင်ငံတော်ကောင်စီမှ ဆောင်ရွက်သည့် စီးပွါးရေးနှင့်ပက်သက်သည့် အလုပ်များကို သွယ်ဝုိုက်ဝေဖန်သည့် သဘောသက်ရောက်သည့် ဝေဖန်ချက်များနှင့် မှတ်ချက်များကို မကြာခဏပြောကြားခဲ့သည် ။ ဤမှတ်ချက်များကို ရေးမှတ်ထားပြီး ဖြန်.ဝေခဲ့သည် ။ ဆိုလိုသည်မှာ စီးပွါးရေးနှင့်ပက်သက်ပြီး ယောင်ဘန်းနှင့် ကျွန်တော့်ကြားမှ ကွဲပြားမှုများကို လူအများက သတိပြုလာသည်ဟု ဆိုလိုခြင်းဖြစ်သည် ။

ဤအခြေအနေကို တိန်.ရှောင်ပင်း သိရှိသွားသည် ။ ၁၉၈၃ ခုနှစ် မတ်လ ၁၅ ရက်နေ.တွင် ယောင်ဘန်းနှင့် ကျွန်တော့်အား သူ.အိမ်သို.လာရောက်ပြီး ပြောဆိုဆွေးနွေးဖို. သူကတောင်းဆိုခဲ့သည် ။ ယောင်ဘန်းက တိတ်ဆိတ်ငြိမ်သက်စွာ နားထောင်နေစဉ်၌ ကျွန်တော်၏ အယူအဆများကို ပြောပြခဲ့ပြီး စီးပွါးရေးနှင့်ပက်သက်ပြီး အစီရင်ခံတင်ပြခဲ့သည် ။ သူက ကျွန်တော်၏ အယူအဆ တချို.ကို ထောက်ခံကြောင်း ပြသခဲ့ပြီး တချို.အချက်များကို ဖြည့်စွက်ရှင်းပြခဲ့သည် ။ ဆွေးနွေးပွဲမှာ ချောချောမွေ.မွေ.ရှိလှသည် ။ နောက်ဆုံး၌ တိန်.ရှောင်ပင်းက စီးပွါးရေးနှင့် ပက်သက်သည့် ကိစ္စရပ်များတွင် ကျွန်တော်၏ အယူအဆများကို ထောက်ခံသည်ဟု ပြောကြားခဲ့သည် ။ သူက ယောင်ဘန်းကို လက်လွတ်စပယ် ပြောကြားခဲ့မှုများနှင့် အဆင်ခြင်မဲ့ လုပ်ရပ်များအတွက် ပြစ်တင်ဝေဖန်ခဲ့ပြီးလျှင် အထွေထွေအတွင်းရေးမှုးတစ်ယောက်အနေဖြင့် စတန်.ထွင်ခြင်းမှာ စိုးရိမ်ဖွယ်ကောင်းသည့် အားနည်းချက်ဖြစ်ကြောင်း ပြောကြားခဲ့သည် ။

တိန်.က “ပြုပြင်ပြောင်းလဲရေးကို အကောင်အထည်ဖော်ရာတွင် လူထုလှုပ်ရှားမှုများကို အသုံးမပြုသင့်ကြောင်း ။ ပြုပြင်ပြောင်းလဲရေးကို ခေတ်မှီရေးလုပ်ငန်းစဉ်လေးရပ်၁နှင့်အညီ အကောင်အထည်ဖော်သွားရမည်ဖြစ်ကြောင်း ။ ၎င်းမှာ နှစ်ကာလ အချိန်တိုတိုလေးအတွင်း၌ ဖြေရှင်းနိုင်သည့် ကိစ္စမဟုတ်ကြောင်း” ပြောကြားခဲ့သည် ။ “အခြေအနေတွေက အလွန်ကောင်းနေတယ် ၊ ဒါပေမယ့် ငါတို.ခေါင်းအေးအေးထားရမယ်”ဟု သူကဆက်လက်ပြောကြားခဲ့သေးသည် ။

ဗဟိုခေါင်းဆောင်မှုစည်းအတွင်းမှ မတူကွဲပြားသည့် အသံများထွက်ပေါ်မှုကို ရှောင်ရှားနိုင်ရန်ရည်ရွယ်၍ လုပ်ပိုင်ခွင့်စည်းကန်.သတ်ချက်တို.ကို ဤဆွေးနွေးပွဲ၌ ချမှတ်ခဲ့သည် ။ နိုင်ငံတော်ကောင်စီနှင့် စီးပွါးရေးနှင့် ဘဏ္ဍာရေးဆိုင်ရာ ဗဟိုဦးဆောင်အဖွဲ.တို.က စီးပွါးရေးဆိုင်ရာ ကိစ္စရပ်တို.ကို စီမံခန်.ခွဲရမည်ဟု ဆုံးဖြတ်ခဲ့သည် ။ မည်သည်ကမှန်၍ မည်သည်ကမှားသည်စသည့် ဆုံးဖြတ်ချက်များအပါအဝင် အရေးကြီးသည့် ဆုံးဖြတ်ချက်နှင့် အမိန်.များကို ဦးဆောင်အဖွဲ.မှ ဆွေးနွေး၍ ၎င်း၏ဆက်သွယ်ရေးလမ်းကြောင်းများမှတစ်ဆင့် ထုတ်ပြန်သွားရမည် ။ နေရာအများအပြားမှ ပြောရေးဆိုခွင့်ရှိသူအများအပြား သို.မဟုတ် မူဝါဒအများအပြား ချမှတ်ပြောကြားနေခြင်းမျိုး နောက်နောင်တွင် မရှိစေရ ။ အတွင်းဝန်များအနေဖြင့် စီးပွါးရေးဆိုင်ရာ ကိစ္စရပ်တချို.ကို စီမံခန်.ခွဲနေရမည်မှာလည်း မလွဲမသွေပင်ဖြစ်သည် သို.သော်လည်း အဓိကအာရုံစိုက်ရမည်မှာ စည်းမျဉ်းစည်းကမ်းများနှင့် မူဝါဒများကိုသာ အလေးထားရပေမည် ။ စီးပွါးရေးကိစ္စရပ် တစ်ခုချင်းစီတွင် ဝင်ရောက်စွက်ဖက်နေခြင်းမျိုး မဖြစ်သင့်ပေ ။

ဤဆွေးနွေးပွဲအပြီး၌ နိုင်ငံတော်ကောင်စီ၏ စီးပွါးရေးဆိုင်ရာ ကိစ္စရပ်များတွင် ယောင်ဘန်း၏ တိုက်ရိုက်ဝင်ရောက် စွက်ဖက်မှုများမှာ သိသိသာသာ လျော့ကျသွားပြီး နိုင်ငံတော်ကောင်စီအပေါ် သူ၏ဝေဖန်မှုများ လျော့နည်းသွားခဲ့သည်။ သို.သော်လည်း စိတ်နှလုံးထဲ၌မူ သူသည် သူ၏အယူအဆများကို မစွန်.လွှတ်ပေ ။ သူ၏ ယူဆချက်များကို ဆက်လက်ပြောကြားဆဲသာရှိသည် ။

ရဲဘော်ရှောင်ပင်းနှင့် ဆွေးနွေးအပြီး၌ အခြေအနေများကို စီမံခန်.ခွဲရသည်မှာ ပို၍လွယ်ကူအဆင်ပြေလာသည်ဟု ကျွန်တော်ခံစားရသည် ။ ထိုစဉ်မှစ၍ ကျွန်တော်၏ ချဉ်းကပ်နည်းမှာ ကျွန်တော်လက်ခံနိုင်သမျှကို လက်ခံကျင့်သုံးခဲ့သည်။ ဆိုလိုသည်မှာ သူ၏(ဟူ၏)အယူအဆများကို မှန်ကန်သည်ဟု ကျွန်တော်ထင်လျှင် လက်ခံကျင့်သုံးသည် ။ သူပြောသည်မှာ လက်တွေ.မကျပါက သူ.တွင်လည်း သူ၏အယူအဆကို ပြောပိုင်ခွင့်ရှိသည် ။ သို.သော် သူ၏အမြင်သည် အများစု၏ သဘောထားဆုံးဖြတ်ချက်ကို ကိုယ်စားပြုခြင်းမရှိသောကြောင့် သူပြောသမျှအားလုံးကို မဖြစ်မနေ လိုက်နာဖို. မလိုအပ်ပေ ။ တိန်.နှင့် ဆွေးနွေးပွဲကြောင့် ဤသို.ဖြစ်ရသည်ကို ယောင်ဘန်းကသိသည် ။ သူ.တွင် ကျွန်တော်သဘောမတူသည့် အယူအဆများ ရှိနေဆဲဖြစ်သည် သို.သော် ကျွန်တော်တို.က ၎င်းတို.အတိုင်း လိုက်နာလုပ်ဆောင်ခြင်းမရှိပါ သူကအပြင်းအထန် ပြောမနေတော့ပေ ။

အရေးကြီးသည့် စီးပွါးရေးအဆိုပြုချက်များ သို.မဟုတ် နိုင်ငံတော်ကောင်စီလေ့လာရေးအဖွဲ.မှ အယူအဆများကို တည်ဆဲပေါ်လစ်ဗျူရိုကော်မတီ သို.မဟုတ် အတွင်းဝန်များရုံးသို. တင်ပြ၍ ဆွေးနွေးစေသည် ။ တစ်ခါတစ်ရံ၌ ယောင်ဘန်းအနေဖြင့် သဘောမတူသည့်တိုင်အောင် ဆန်.ကျင်မှုကို ပြသဖို. မလွယ်ကူပေ ။ “ကောင်းပြီလေ ။ ဒီအတိုင်းပဲရှိပါစေတော့”ဟု သူကပြောလေ့ရှိသည် ။ သို.သော် နောက်ကွယ်တွင်မူ “ဒါဟာ အကျပ်ကိုင်ခံရပြီး ထိုးလိုက်တဲ့ လတ်မှတ်ပဲ ။ ဒီကိစ္စနှင့်ပက်သက်လို. နိုင်ငံတော်ကောင်စီက ဘာတွေဆွေးနွေးတယ်ဆိုတာကို ငါတို.သိတောင်မသိဘူး ဒါ့ကြောင့်ငါတို.မှာ သဘောတူလက်ခံရုံကလွဲလို. ဘာမှမတတ်နိုင်ဘူး”ဟု သူက တည်ဆဲပေါ်လစ်ဗျူရိုကော်မတီအဖွဲ.ဝင် ဟူကျိလီကိုပြောသည် ။ ၁၉၆၀ ခုနှစ်များအတွင်းက ဥက္ကဋ္ဌကြီးမော်သည် နိုင်ငံတော်စီမံကိန်းရေးဆွဲရေးကော်မရှင်နှင့် ပက်သက်၍ ကျေနပ်မှုမရှိသည့်အချိန်က “အကျပ်ကိုင်ခံရပြီး ထိုးလိုက်တဲ့ လတ်မှတ်”ဟူသည့် စကားမျိုး ပြောဆိုသုံးနှုန်းခဲ့ဖူးသည် ။ ယခု ယောင်ဘန်းသည်လည်း ဤသို.သောခံစားမှုမျိုး ဖော်ပြပြောဆိုလာသည့်အတွက် ကျွန်တော့်အနေဖြင့် သတိထားမှဖြစ်ပေတော့မည် ။

ယောင်ဘန်းနှင့် ဆက်ဆံရေး တိုးတက်အဆင်ပြေစေရန်အတွက် နိုင်ငံတော်ကောင်စီနှင့် စီးပွါးရေးနှင့်ဘဏ္ဍာရေး ဦးဆောင်အဖွဲ.မှ အစည်းအဝေးများ လုပ်သည့်အခါတိုင်း၌ ကျွန်တော်တို.က ဟူကျိလီ၊ နိုင်ငံတော်စီမံကိန်းရေးဆွဲရေးအဖွဲ. လက်ထောက်ညွှန်ကြားရေးမှုးချုပ် ဟိုဂျင်းရှုနှင့် အတွင်းဝန်များရုံးမှ တခြားရဲဘော်များကို ပါဝင်တက်ရောက်စေရန် ဖိတ်ကြားခဲ့သည် ဤသို.အားဖြင့် ဆွေးနွေးမှုကို ယောင်ဘန်းထံသို. သူတို.အစီရင်ခံတင်ပြနိုင်ပေလိမ့်မည် ။ နိုင်ငံတော်ကောင်စီနှင့် စီးပွါးရေးနှင့်ဘဏ္ဍာရေး ဦးဆောင်အဖွဲ.၏ အစည်းအဝေးများသို. သူ၏ဝန်ထမ်းများကို စေလွှတ်တက်ရောက်စေရန်လည်း ကျွန်တော်က ယောင်ဘန်းကို အကြံပြုခဲ့သည် ။ သို.သော် မည်သည့်အတွက်ကြောင့်မှန်းမသိ ယောင်ဘန်းက ဤသို.စေလွှတ်ခြင်းမရှိပေ ။

ဆက်ဆံရေးအဆင်ပြေတိုးတက်စေရန်နှင့် ယောင်ဘန်းအနေနှင့် အချိန်ယူ၍ သေချာစဉ်းစားသုံးသပ်နိုင်ရန်အတွက် အရေးကြီးသည့် စီးပွါးရေးကိစ္စရပ်များကို ပုံမှန်လုပ်ထုံးလုပ်နည်းများအရ တည်ဆဲကော်မတီနှင့် အတွင်းဝန်များရုံးသို. တင်ပြမဆွေးနွေးမှီတွင် ယောင်ဘန်းထံသို. ပုဂ္ဂိုလ်ရေးအနေနှင့် အစီရင်ခံဖို.ကိုလည်း ကျွန်တော်က အကြံပြုခဲ့သည် ။ တည်ဆဲပေါ်လစ်ဗျူရိုကော်မတီသို. မတင်ပြမှီတွင် ကျွန်တော်တို.အနေဖြင့် သူ.ထံသို. ကြိုတင်အစီရင်ခံမည့် စိတ်ကူးကို ယောင်ဘန်းက သဘောတူသည် ။ အစပိုင်းတွင် သူကစိတ်ဝင်စားမှုရှိဟန်တူသော်လည်း နောက်ပိုင်းအကြိမ်များစွာ ကြာလာသောအခါ၌ စိတ်ဝင်စားမှုမရှိတော့ပဲ ရပ်တန်.လိုက်ရန် သူကတောင်းဆိုခဲ့သည် ။ ဤကိစ္စမှာ မည်သည့်အခါမျှ မပြေလည်ခဲ့ပေ ။

တစ်ယောက်နှင့်တစ်ယောက် လုပ်နည်းလုပ်ဟန်ကွဲလွဲမှု အပါအဝင် စီးပွါးရေးနှင့်ပက်သက်သည့် အတွေးအခေါ် ကွဲလွဲမှုများသည် ဤအကြောင်း၏ အခြေခံအချက်များ ဖြစ်ဟန်တူသည် ။ ရှောင်ပင်းက စည်းမျဉ်းကန်.သတ်လိုက်သောကြောင့် ယောင်ဘန်းသည် နိုင်ငံတော်ကောင်စီနှင့် စီးပွါးရေးနှင့်ဘဏ္ဍာရေး ဦးဆောင်အဖွဲ.အပေါ်တွင် သူ၏အယူအဆများကို အတင်းအကျပ် မပြဋ္ဌာန်းနိုင်တော့ပေ ။ ထို.ကြောင့် ပြဿနာကို ပို၍ကောင်းမွန်သည့် ဆက်ဆံရေးဖြင့် မဖြေရှင်းနိုင်တော့သည့်ပုံ သို.မဟုတ် စီးပွါးရေးနှင့်ပက်သက်သည့် နိုင်ငံတော်ကောင်စီ၏ ဆွေးနွေးမှုများတွင် သူ.အား ပါဝင်ခြင်း မပြုစေတော့သည့်ပုံ ရှိပေသည် ။

ဤပြဿနာသည် ဆက်လက်၍တည်ရှိနေဆဲ ဖြစ်သည့်တိုင် တိန်.ရှောင်ပင်း၏ နေအိမ်၌ ဆွေးနွေးအပြီး၌ ကျွန်တော်တို.နှစ်ယောက်သည် တစ်ယောက်နှင့်တစ်ယောက် ဆက်ဆံလုပ်ကိုင်ရာ၌ သတိကြီးစွာထားနေကြပြီး ဆက်ဆံရေးမှာလည်း လွန်မင်းစွာ တင်းမာမလာခဲ့ပေ ။ အနည်းဆုံးအားဖြင့်တော့ စီးပွါးရေးနှင့်ပက်သက်၍ ပြင်ပကမ္ဘာအနေဖြင့် သိသိသာသာ သတိထားမိစေမည့် အသံနှစ်သံ ထွက်နေသည့်ပုံမျိုး မရှိတော့ပေ ။

-----------------------------------------------------------------------------------------------------------------

၁ ။ ။ ခေတ်မှီရေး လုပ်ငန်းစဉ်လေးရပ်မှာ ပြုပြင်ပြောင်းလဲရေး အစီအစဉ်များကို တိုးတက်အကောင်အထည်ဖော်ရေးနှင့် တရုတ်ပြည်၏ စီးပွါးရေးဖွံ.ဖြိုးစေရေးအတွက် အဓိကကျသည့် နယ်ပယ်များဖြစ်သည်ဟု တိန်.ရှောင်ပင်းယူဆသည့် နယ်ပယ်လေးရပ်ဖြစ်သည် ။ ၎င်းတို.မှာ စိုက်ပျိုးရေး ၊ စက်မှုလုပ်ငန်း ၊ သိပ္ပံနည်းပညာနှင့် ကာကွယ်ရေးတို.ဖြစ်သည် ။

(ကျောက်ကျိယန်၏ Prisoner of the State စာအုပ်မှ Part 3, Chapter 5 Zhao and Hu Clash ကို ဘာသာပြန်ဆိုထားခြင်းဖြစ်ပါသည် ။ )